出咗嚟做嘢之後，私人時間自然少咗好多。平日返工 OT，weekend就只想hea喺屋企煲劇、瞓覺。其實抖吓係應該嘅，但如果每個週末都咁過，可能有啲嘢你永遠都冇機會再做。趁仲有時間，試吓做返啲有意義嘅事，生活會充實好多。

重拾閱讀習慣
唔少人一睇書就眼瞓，但知識係一世嘅。你唔一定要睇學術書，小說、旅遊書、散文、圖文書都得。最重要係建立返閱讀習慣，提升文化水平。咁就算hea喺屋企，都可以hea得有營養。

陪父母食飯或旅行
打工仔 OT、輪更，返屋企食飯都各自玩手機、睇電視。其實只要抽一晚，認真同屋企人食餐飯，面對面傾吓偈，已經好溫馨。如果有長假期，不如陪父母去旅行。雖然麻煩，但總好過等到冇機會先後悔。

約返朋友聚會
讀書嗰陣三日唔埋兩日就見班 friend，依家出咗嚟做嘢，甚至有家庭，聚會就愈來愈少。好多藉口：冇時間、怕尷尬、冇聯絡。但其實只要有心，依家通訊咁方便，約出嚟真係唔難。諗吓父母嗰代，想搵返舊 friend 都無從入手，你就會覺得自己幾幸福。

去樂園瘋狂玩一日
人大咗，覺得去樂園係幼稚。但童真唔一定要同成熟對立。搵日去主題樂園癲返日，放低現實壓力，重拾童真。其實玩得開心，先係真正嘅放鬆。

重拾舊有興趣
每個人都有一、兩樣興趣：樂器、畫畫、摺紙、陶瓷、跳舞……但因為冇時間，慢慢放低咗。其實有一技之長，或者有一樣自己真心鍾意做嘅活動，係好難得嘅事。唔好因為忙，就放棄咗令自己快樂嘅東西。

好耐冇同屋企人正正經經食餐飯？好耐冇揸過本書嚟揭？人大咗，生活忙咗，唔代表要放棄以前令自己快樂嘅事。唔好再懶，由今日開始，weekend唔只係抖，仲要活得有意義。

文：Noelle＠ECjobsonline 編輯部